Shoqata AlbNatyra është themeluar në vitin 2008 me Vendimin e Gjykatës nr. 2358 me emrin “Shoqata Rajonale e Pyjeve dhe Kullotave, Qarku Elbasan”. Shkurtesa e përdorur ka qenë RACFP për emërtimin në anglisht të shoqatës ‘’Regional Association for Comunal Forest and Pastures’’. Shoqata shërbeu si ombrellë e shoqatave lokaleve të pyjeve dhe kullotave komunale deri në vitin 2016 kur është ndryshuar emri në “Shoqata AlbNatyra” me vendimin nr.2358/1.

Nga viti 2008 deri më 2016 Shoqata ka patur si mision kryesor menaxhimin e qendrueshëm të burimeve natyrore kryesisht me menaxhimin e pyjeve dhe të kullotave komunale. Veprimtaritë e zhvilluara lidheshin kryesisht me rritjen e kapaciteteve të shoqatave lokale të pyjeve dhe kullotave, mbështetjen me trajnime, mbështetjen me këshillime si dhe përfaqësimin e tyre duke lobuar për çështjet e pyjeve dhe kullotave në nivelet më të larta të vendimmarrjes të shtetit Shqiptar. Përdorimi tradicional i pyjeve dhe kullotave siguron vazhdimësinë dhe menaxhimin e qendrueshëm të burimeve natyrore lokale.

Në vitet e fundit AlbNatyra ka zgjeruar misionin e saj duke zhvilluar projekte të rëndësishme në zonën e veprimit brenda Qarkut të Elbasanit. Këto projekte mbulojnë çështje gjithëpërfshirëse në menaxhimin e qendrueshëm mjedisor dhe të turizmit me ndërhyrje konkrete në menaxhimin e këtyre burimeve natyrore dhe me mbështetjen e banorëve, të rinjve dhe grave.