Lajmet e fundit
now browsing by category
Lajmet e fundit
Miqtë e jetës së egër të Shebenikut
Në datat 28-30 gusht, grupi ynë i apasionuar “Miqtë e jetës së egër të Shebenikut” organizoi një shkollë verore të veçantë, ku eksploruam, mësuam dhe u frymëzuam për të mbrojtur mjedisin dhe biodiversitetin e këtij thesari natyror.U njohëm me habitatet, monitoruam florën dhe faunën e parkut, dhe krijuam herbariume që do të ndihmojnë në studimet mjedisore të ardhshme.
Dita e parë na solli një prezantim tërheqës nga specialistët e AdZM Elbasan, duke na treguar gjithçka mbi Parkun Kombëtar të Shebenikut si dhe sfidat që e kërcënojnë atë.
Udhëtuam me biçikleta në brendësi të parkut dhe forcuam shpirtin e skuadrës nëpërmjet lojërave dhe eksplorimeve të natyrës.
Të udhëhequr nga ekspertja Ermelinda Gjeta u zhytëm në një aventurë e veçantë në botën e bimëve duke identifikuar bimët e ndryshme të parkut zbuluam edhe vetitë e tyre specifike të cilat i shënuam në herbariumin e krijuar nga vetë të rinjtë.U përqëndruam në mënyrat se si komuniteti lokal mund të përfshihet në mbrojtjen e Parkut të Shebenikut. Diskutuam dhe ndamë ide për të përmirësuar ruajtjen e kësaj pasurie natyrore të çmuar.
Ky aktivitet realizohet në zbatim të projektit titull “Nxitja e banorëve për mbështetjen e menaxhimit të qëndrueshëm’’ (Foster Connection ëith the local community to support the sustainable management). Projekt i cili financohet nga Prespa Ohrid Nature Trust (PONT),
Aktivitete të tilla ne si organizate mjedisore do ti kemi në vëmendje për ti realizuar ne cdo kohë pasi ndikojnë drejtpërsëdrejti në emancipimin e brezit të ri.
Më poshtë po ndajmë me ju këtu disa nga çastet e kapura me foto të këtyre ditëve.
Të rinjtë për natyrën e Parkut Kombëtar Shebenik
Gjatë fundjavës kishim kënaqësinë të zhvillonim ekspeditën e radhës me nxënësit shkollës “Vilson Blloshmi”, dhe këtë herë shprehën dëshirën e na u bashkuan edhe nxënës pak më të vegjël por të appasionuar pas natyrës, nxënësit e shkollës “Genc Leka”.
Së bashku, eksploruam natyrën, mësuam për mjedisin dhe diskutuam mbi rëndësinë që ka përkujdesja për të.
Ndalesa e parë ishte “Qendra e Vizitorëve”, ku fëmijët mësuan për llojet e ndryshme të bimëve dhe kafshëve që e quajnë parkun e Shebenikut shtëpinë e tyre. Nga zogjtë mahnitës deri te kafshët e fshehura, kishte shumë për të zbuluar dhe kuptuar mbi biodiversitetin e parkut dhe rëndësinë që ai ka.
Vazhduam ecjen më tej në park, ku u përshëndetëm nga pamja e mrekullueshme e Liqenit të Fushës së Studnës i cili shtrihet mbi fushen e stergjatur perbri pyjeve te larta te ahut.
Gjatë ecjes tonë mësuam mbi praktikat e monitorimit të zonave të mbrojtura dhe gjithashtu zhvilluam një monitorim të dendësisë të bimës së Salepit (Orchis mascula), ku shënuam më shumë se 200 specie të kësaj bime në zonën përreth Liqenit! Me këtë ekspeditë, synuam jo vetëm të edukojmë dhe frymëzojmë këto mendje të reja dhe rritjen e kapaciteteve monitoruese por edhe të kultivojmë një ndjenjë përgjegjësie ndaj mjedisit tonë. Duke dëshmuar bukurinë e Parkut Shebenik, shpresojmë të rrisim te këta nxënës një pasion për ruajtjen e mjedisit që do të
zgjasë gjithë jetën.
Ky aktivitet mbeshtetet Prespa Ohrid Nature Trust (PONT ) nnepermjet projektit “Strengthening the role of local community as an important stakeholder for biodiversity protection”.
Ne mbeshtetje te fermereve te rinj te Shebenikut
Kishim kënaqësinë të mirëpritnim në një vizitë në zonën tone të projektit, përfaqësuesit e PONT dhe CEPF, të cilët janë mbështetësit e dy projekte aktuale që po zbatojmë. Gjatë kësaj vizite, u takuam dhe na priti në stanin e tij, Tafil Allkja së bashku me dy djemtë e tij, Kastriotin dhe Isain.
Është frymëzuese të shohim punën e palodhur të banorëve vendas dhe vlerësojmë gjithmonë rolin dhe ndihmën që mbarështrimi i bagëtive të imta.
Dy vellezerit kane vendosur te mbarshtojne bagetite e imta (dhi) te cilat gjate sezonit te veres por edhe pjeserisht ne dimer i kullosin ne pyjet dhe kullotat e Parkut Kombetar Shebenik.
Shoqata AlbNatyra po punon për mbeshtetjen e barinjve te rinj si nje brez i cili duhet te mesoje me shume per mbrotjen e mjedisit, bimeve te rrezikuara por edhe rritjen e ekonomise lokale.
Nepermjet mbeshtetjes te siguruar nga CEPF, ne jemi duke vazhduar me procesin e ndergjegjesimit, komunikimit dhe nxitjes te komunitetit dhe te barinjve per mbrojtjen e specieve te rrezikuara ne park.
Ne zbatim te aktiviteteve te projektit do te mbeshtesim keto barinj me disa aksesore te nevojshem dhe jetesore per ta, si; panele diellore, permiresimin e kushteve higjenes dhe mjete te tjera te domosdoshme.
Parku Kombëtar “Shebenik”
PARKU KOMBËTAR “SHEBENIK” (i ndryshuar)
Me VKM nr. 59 datë 26.01.2022 botuar në fletoren zyrtare (nr.16) Parku Kombëtare Shebenik-Jabllanice ka pësuar ndryshime në emrin e tij, sipërfaqen dhe zonimin e tij. Sipas këtij vendimi parku do të quhet: Parku Kombëtar “Shebenik” ndërsa sipërfaqa e tij nga 33 927.66 hektarë bëhet 34 507.9 hektar, gjithashtu ka ndryshime të tehksuara në korigjimet që janë bërë hartës dhe kufirit të parkut si dhe zonimit të këtij parku. Bie në sy heqja që është bërë sipërfaqes në pellgun ujëmbledhës të lumit Bushtrica, si dhe nuk eshte marre parasysh kërkësa e herë pas hershme të disa banorëve të disa fshatrave për tu hequr nga harta e parkut, pra nuk është reflektuar. Ndërkohë ka një shetsë mbi 1000 hektarë në bashkinë Bulqizë e cila bën pjesë në qarkun Dibër. Sipas mendimit tonë ky ndryshim nuk reflekton atë që është kërkuar, madje ka ndryshime të pakuptimta të sipërfaqes por edhe të zonimit.
Me poshtë po pasqyrojmë VKM nr 59 datë 26.01.2022
Zona brenda këtij ekosistemit natyror përfshin pyje, bujqësore, shkurre, kullota, sipëraqe heterogjene bujqësore, sipërfaqe me vegjetacion të pakët dhe bimësi barishtore. Mbulesa e tokës brenda siperfaqes së Parkut Kombëtar, jepet në Tabelën 1. më poshtë
Tabela 1. Sipërfaqja e PK-së, e përshkruar sipas mbulesës.
| Mbulesa | Sip. në ha | Përqindja |
| Pyje | 16359 | 47.41 |
| Sipërfaqe heterogjene bujqësore | 1930.1 | 5.59 |
| Sipërfaqe me vegjetacion të pakët | 1972.8 | 5.72 |
| Kullota | 93.9 | 0.27 |
| Urbane | 49.1 | 0.14 |
| Shkurre & Bimësi barishtore | 14103 | 40.87 |
| Total | 34,507.9 | 100.00 |
Ekosistemi natyror “Shebenik”, shpallur me status “Park Kombëtar” ndahet në katër nënzona ruajtjeje e administrimi, si më poshtë vijon:
a) Nënzona Qëndrore A, me sipërfaqe 2129.62 (dy mijë e njëqind e njëzet e nëntë presje gjashtëdhjetë e dy) ha, e shënuar në hartë me ZQ A.
Kjo nënzonë përfshin habitatet kryesore pyjore, shkurresh dhe përcaktohet si zonë me vlera të larta e të rralla për trashëgiminë natyrore e biodiversitetin dhe në të zbatohet shkalla e më lartë e mbrojtjes, që siguron një territor të pashqetësuar. Në këtë nënzonë lejohen kërkimi shkencor, zhvillimi i veprimtarive ekoturistike te kontrolluara në natyrë. Në ZQ A janë të ndaluara: prerja e drurëve dhe e shkurreve; përdorimi i kimikateve dhe i plehrave kimike; ndërtime të çdo lloji; nxjerrja e mineraleve dhe e torfave; ndezja e zjarreve; kullotja, kalimi i kafshëve shtëpiake dhe ndërtimi i objekteve për mbajtejn e tyre; etj.
b) Nënzona Qëndrore B, me sipërfaqe 14562.37 (katërmbëdhjetë mijë e pesëqind e gjashtëdhjetë e dy presje tridhjetë e shtatë) ha, e shënuar në hartë me ZQ B.
Kjo nënzonë përfshin habitatet kryesore pyjore, shkurresh dhe përcaktohet si zonë me vlera të larta e të rralla për trashëgiminë natyrore e biodiversitetin dhe në të zbatohet shkalla e më lartë e mbrojtjes, që siguron një territor të pashqetësuar. Në këtë nënzonë lejohen kërkimi shkencor, zhvillimi i veprimtarive ekoturistike të lira në natyrë. Në ZQ B janë të ndaluara: shfrytëzimi i tokës me teknologji intensive, me mjete dhë mënyra që shkaktojnë ndryshime rrënjësore në biodiversitet, në strukturën dhe funksionet e ekosistemeve ose që dëmtojnë në mënyrë të pandreqshme në sipërfaqen e tokës; neutralizimi i mbetjeve me origjinë jashtë territorit të “Parkut Kombëtar”; shpërndarja e kafshëve dhe e bimëve jovendase, kur ato sjellin ndryshime në biodiversitetin e sonës; riprodhimi intensiv, me përjashtim të riprodhimeve shpëtuese; ndërtimi i rrugëve, autostradave, hekurudhave, zonave urbane, hidrocentraleve, linjave të tensionit të lartë dhe sistemeve të naftës dhe gazit me shtrirje të gjatë; larja dhe spërkatja e rrugëve me kimikate; mbjellja e pyjeve monokulturë; etj.
c) Nënzona e Përdorimit Tradicional dhe Zhvillimit të Qëndrueshëm, me sipërfaqe 17673.82 (shtatëmbëdhjetë mijë e gjashtëqind e shtatëdhjetë e tre presje tetëdhjetë e dy) ha, e shënuar në hartë me ZPTQ.
Kjo nënzonë përfshin tokat pyjore, bujqësore e kullotat, ku mundësohet vazhdimi i veprimtarive tradicionale si punime për shëndetësimin e pyjeve, aktivitete bujqësore, kullotja, grumbullimi dhe kultivimi i bimëve mjekësore e aromatike, me përdorim të balancuar të tyre dhe nuk lejohen ndërtimet e veprimtaritë që shkaktojnë ndryshimin e gjendjes natyrore të ekosistemit natyror. Në nënzonën e përdorimit tradicional dhe zhvillimit të qëndrueshëm, zbatohet shkalla e dytë e mbrojtjes, që siguron një territor me ndikim të ulët dhe kontroll të veprimtarive ekonomike, sociale, agrobiznesit, argëtuese, sportive e ekoturistike, ndërtimi i infrastrukturës sipas planeve të zhvillimit urban e turistik të miratuar nga Këshilli Kombëtar i Territorit (KKT), të cilat nuk cenojnë integritetin ekologjik të ekosistemit natyror dhe respektojnë funksionet e zonës së mbrojtur, vlerat ekologjike dhe ato të peizazhit natyror e kulturor.
d) Nënzona e Rekreacionit me sipërfaqe 142.09 (njëqind e dyzet e dy presje zero nëntë) ha, e shënuar në hartë me ZR.
Në këtë zonë përfshihen pjesë të habitateve pyjore, kullotave dhe bimësi pyjore. Në këtë zonë zbatohet shkalla e tretë e mbrojtjes, që siguron një territor me ndikim të ulët dhe kontroll të veprimtarive turistik, si mundësi shetitje në natyrë, shërbime turistike në mënyrë të tillë që respektojnë funksionet e zonës së mbrojtur, vlerat e tij ekologjike dhe ato të peizazhit natyror, në mbështetje të studimeve urbanistike të miratuar nga KKT-ja.
Zonimi dhe sipërfaqet në Parkun Kombëtar “Shebenik” jepen në Tabelën 2.
Tabela 2. Zonimi i brendshëm i PK-së.
| Zonimi | Sipërfaqe ha | Perqindja |
| Zona qëndrore A | 2129.62 | 6.17 |
| Zona qëndrore B | 14562.37 | 42.20 |
| Zona e përdorimit tradicional dhe zhvillimit të qëndrueshëm | 17673.82 | 51.22 |
| Zona e rekreacionit | 142.09 | 0.41 |
| Totali | 34507.9 | 100.00 |
Administratat Rajonale të Zonave të Mbrojtura, Qarku Elbasan dhe Dibër, kryejnë funksionet menaxhuese të Parkut Kombëtar “Shebenik”.
Të rinjtë kontriboujnë për mjedisin e parkut kombëtar Shebenik
Klubi i Mjedisit të shkollës ‘Shefqet Dosku’’ në Dorëz, së bashku me stafin e AdZM Elbasan krahas viztës të realizuar në Shpellën e Akullit pikturuan koritën e ujit të bagëtive, e cila është ndërtuar vitin e shkuar nga projekti i mbështetjes së blegtorëve zbatuar nga AlbNatyra dhe finacuar nga CEPF.
Kjo veprimtari u zhvillua si pjesë e programit mjedisor financuar nga PONT dhe CEPF.
Fotot flasin vetë andaj ju ftojmë të shikoni se çfarë pune e bukur është bërë sot, ky është një nga postimet e shoqatës AlbNatyra në fanpage të facebook-ut.
Shoqata AlbNatyra gjatë kësaj periudhe po zhvillon një sërë aktivitetesh që kanë të bëjnë me menaxhimin dhe mbrojtjen e parkut, sidomos në aktivimin e komunitetit dhe shoqërisë civile për të reaguar në situata emergjente që mund të shfaqen në mjedisin e parkut kombëtar Shebenik.
Prespa Ohrid Nature Trust (PONT)
Sigurohet ujë i pijshëm për bagëtitë në kullotat e parkut kombëtar Shebenik-Jabllanicë
Rreth 400 kokë dele sot në këto temperatura të larta, kanë mjaftueshëm ujë të pijshëm, ku AlbNatyra ka ndërtuar dhe rehabilituar 2 korita uji të cilat kanë përmasa: 20 metra të gjata dhe 40×40 cm.
Mungesa e ujit të pijshëm për bagëtitë ka sjellë një përkeqësim të kushteve për mbarështimin e tyre. Numri i tyre vitet e fundit po reduktohet dukshëm, kjo për pasojë edhe e mungesës së mbështetjes së barinjve me kushtet bazë të nevojshme.
Shoqata AlbNatyra pas përfundimit të Koritave do të përmirësojë kushtet e higjienës sidomos të banjove të cilat sot janë mjaft të vështira. Së pari do të realizohet ndërtimi i gropave septike të cilat mungojnë.
Pas kësaj faze do të përmirësohet furnizimi dhe përdorimi i ujit në banjo me disa punime hidraulike. Gjithashtu do të sigurohen dushe me dru zjarri për të përmirësuar kushtet për barinjtë të cilët sot lahen në kushte jo normale.
Të gjitha këto po realizohen në kuadër të projektit “Mbrojtja e biodiversitetit në Kullotat e Parkut Kombëtar Shebenik-Jabllanicë” Minigrant i fituar dhe i mbështetur nga CEFP (Critical Ecosystem Partnership Found) nëpërmjet BirdLife International.
Mbështetja dhe bashkëpunimi me AdZM Elbasan ka qenë mjaft produktive dhe shpresojmë që në të ardhmen të realizojmë projekte të tjera më të rëndësishme.
Sigurohet internet për barinjtë në Shebenik
Në kuadër të projektit “Mbrojtja e biodiversitetit në kullotat e Parkut Kombëtar Shebenik-Jabllanicë” shoqata AlbNatyra mundësoi ndërtimin e një antene interneti e cila ju vjen në ndihmë blektorëve për përmirësimin e kushteve të komunikimit në stanet e tyre.
Kushtet e vështira në stane, që gjenden në zonat malore ka ndikuar në uljen e interesit për të mbajtur dhe shtuar numrin e bagëtive në kullotat alpine.
Për këto arsye me mbështetjen e BirdLIFE dhe nëpërmjet CEPF shoqata AlbNatyra nëpërmjet kompanisë “Interfiber” po bën të mundur furnizimin me sinjal interneti të disa staneve që gjenden në kullotat alpine.
Ky objektiv u arrit me sukses me kërkesë dhe me mbështetjen e AdZMElbasan si edhe me qëllimin kryesor mbrojtjen e biodiversitetit në Parkun Kombëtar Shebenik-Jabllanicë.
Pas kësaj faze AlbNatyra do të mbështesë barinjtë edhe me panele fotovoltaike për ndricim si edhe për përmirësimin e kushteve higjeno-sanitare kryesisht të mirëfunksionimit të banjove (gropa septike,paisje hidraulike dhe dushe).
Me përmirësimin e kushteve synojmë që të rinjtë ta shohin si një mundësi e mirë punësimi duke patur parasysh edhe përmirësimin e kushteve në stanet e Shebenikut.
Gjithsesi ky do të jetë një model që duhet zbatuar edhe në stanet e tjera që ushtrojnë aktivitetin e kullotave në Parkun Kombëtar Shebenik-Jabllanicë.
Inventarizimi i bimëve të kullotave në Parkun Kombëtar Shebenik-Jabllanicë
AlbNatyra është duke mbështetur blektorët për sigurimin e ujit të pijshëm për bagëtitë në Parkun Kombëtar Shebenik-Jabllanicë.
Ky aktivitet po zbatohet në kuadër të projektit “Mbrojtja e bimëve të rrezikuara në Parkun Kombëtar Shebenik-Jabllanicë” i cili financohet nga Critical Ecosystem Partnership Found #CEPF, nëpërmjet BirdLife International.
Rindërtimi dhe rehabilitimi i dy koritave për sigurimin e ujit të pijshëm për bagëtitë do të përmirësojë ndjeshëm kushtet për kullotat, të cilat ndikojnë direkt në mbrojtjen e kullotave nga ekspansioni i bimëve të tjera mbi kullota.
Shumë bimë të tjera si dëllinja, fieri, ahu dhe shkurre të tjera po pushtojnë kullotat për shkak të rënies së numrit të bagëtive në kullota, ku për pasojë kemi prishje të ekuilibrave floristike dhe kërcënim serioz të bimëve të rrezikuara.
Për këto arsye lind nevoja që të mbështetën blektorët me disa kushte që ata të mos vazhdojnë të abondonojnë këtë aktivitet mjaft të rëndësishëm.
AlbNatyra do të mbështesë disa nga stanet me internet dhe përmirësimin e kushteve higjeno-sanitare.
Projekti por realizohet në bashkëpunim me AdZM Elbasan nëpërmjet stafit të parkut si dhe me përfshirjen e aktorëve të tjerë lokal.
#CEPF #BirdLife_International #AdZMElbasan #Albanianature
Malet e Kuqe
Malet e Kuqe, kështu më kujtohet nga fëmijëria kur dëgjoja të moshuarit që diskutonin në ndonjë sebep apo takime të ndryshme të asaj kohe. Kush janë Malet e Kuqe?
Sot si çdo toponim i huaj që ka ngelur nga sundimet e ndryshme në vendin tonë, ashtu dhe ky mal sot quhet Shebenik. Nga disa të dhëna jo zyrtare thuhet që emri Shebenik ka ngelur për faktin që kur u punuan hartat ushtarake Shqiptare, ishin të përfshirë specialistë të ushtrisë Ruse dhe Jugosllave dhe qëllimisht këto emra jo vetëm që nuk u ndryshuan me emra Shqip por ndodhi e kundërta. Shumë emërtime dhe toponime u shënuan në gjuhën sllave. Fjala Shebenik nuk ka asnjë kuptim në gjuhën Shqipe, ndërsa Malet e Kuqe është emri origjinal që është trashëguar brez pas brezi në zonën e Librazhdit. Pse quheshin malet e kuqe? Ky emër mendohet të ketë ardhur për shkak se gjatë perëndimit të diellit këto maja malesh vezullojnë në gjyrë të kuqerremtë. Ky vezullim vjen për shkak se Malet e Kuqe (Shebenik) janë të përbërë nga shkëmbinj me mineral kromi dhe hekur-nikeli. Emri Shebenik përveç faktit që ngeli në hartat ushtarake të përgatitura nga rusët, u reklamua më shumë me vendimin e Këshillit të Ministrave nr.640 date 21.05.2008 ku ky vargmal u shpall Park Kombëtar me emrin “Parku Kombëtar Shebenik-Jabllanicë” . Këtu përsëri gabimi trashet duke i shtuar një toponim tjetër të huaj. Mali i Jabllanicës është në Lindje të fshatit Stëblevë. Një pjesë prej 100 hektarësh shtrihet brenda kufijve të Republikës së Shqipërisë, ndërsa pjesa më e madhe shtrihet brenda kufinjve të Republikës së Maqedonisë së Verit.
Nga informacionet që kemi marrë ky emërtim është vendosur me qëllim që ky park të shpallej në të dyja anët e kufirit si një park ndërkufitar, por që për fat të keq shteti maqedonas akoma nuk e ka shpallur atë sipërfaqe Park Kombëtar. Gjithsesi, si do që të jetë emri, sot ky park është një nga zonat e mbrojtura më të bukura të Shqipërisë me resurse natyrore të pafundme, si nga flora,fauna ashtu edhe nga hidrografia.
Festa ”Miqtë e malit” në Komunën Gjinar Elbasan
Tashmë është bërë traditë e përvitshme e këtij aktiviteti të madh festiv i cili organizohet nën kujdesin e stafit të Komunës Gjinar, Elbasan në fillim të muajit qershor .
Një festë pothuajse me shumë aktivitete, duke filluar nga panairi me produkte vendase: bulmet, mjaltë, komposto, pije etj, të cilat serviren nga banorët. Gjithashtu kemi dhe produktet artizanale ku përmendim punimet me grep, qëndistari si dhe veshjet dhe kostumet popullore që e bëjnë këtë festë mjaft interesante për pjesëmarrësit e shumtë, të cilët vijnë nga të gjitha anët jo vetëm nga komuna Gjinar por edhe nga Elbasani, Tirana e pse jo edhe të huaj (Zv.Ambasadorja e Suedisë).
Vlerësime maksimale ka marrë stafi organizativ, i cili me modestinë dhe me mundësitë e pakta financiare arrijnë të realizojnë një koncert me kenge, valle dhe lojra popullore tradiconale të zonës. Te ftuarit në këtë festë janë të shumtë, por vihet re pjesëmarrja e deputetëve të zones, prefekti, kryetarë komunash etj, të cilët e vlerësojnë këtë aktivitet dhe e shohin me interes te madh .
Tradita e komunës Gjinar vazhdon në një mënyrë të qëndrueshme dhe kjo festë tashmë ka marre një emër ”Miqtë e malit”, me një kuptim të madh ku njerëzit ngado që vijnë shijojnë bukuritë natyrore të pikes turistike Gjinar, e cila u jep mundësinë e çlodhjes dhe argëtimit në një peisazh të gjelbër si dhe me një ajer të pastër të ofruar nga pishat bujare, të cilat janë mbrojtur me fanatizëm nga komuniteti i kësaj zone.
Për realizimin e kësaj feste të madhe Komuna Gjinar ka bashkëpunuar ngushtë me fondacionin CNVP, e cila disa vjet rresht ka mbështetur këtë komunë në shumë projekte mbi pyjet dhe kullotat, ku këtu vlen të permenden : regjistrimi i pyjeve në pronësi të komunës, hartimit të planit strategjik, ngritja e kapaciteteve organizative e shoqatës së zhvillimit të burimeve natyrore si dhe mundësimin e shkëmbimit të eksperiencave dhe përvojave me shoqata të ndryshme brenda dhe jashtë vendit.
Janaq Male, drejtues i kësaj organizate, në çdo kohë ka shprehur gatishmërinë e tij për të mbështetur këto aktivitete që i japin jetë zonave rurale.
Vlerësojmë dhe inkurajojmë stafin e kësaj komune të ndjekë këtë rrugë për të konkretizuar projekte të tjera të rëndësishme për zhvillimin rural të kësaj zone.
